ولله زمان وبعوده وكده.. بقالي سنة وشويات مبكتبش هنا، اه محدش بيقرالي ولا متابع بس بحبها اكتب هنا برضو.. ما علينا، الفترة اللي فاتت لغايه دلوقتي وانا في موجة تغيرات غير طبيعية.. كل حاجة! كل حاجة عندي اتغيرت.. أصبحت كائن سخيف لناس كتيرة وده شيئ يشرفني صراحة، أشخاص في حياتي انسحبت في هدوء وناس انسحبت بردح وقلت من نفسها قدامى بعد عشرة ومحبة صادقة.. قالولي انتي شايفه بقيتي عاملة ازاي؟ قريتيلك كتابين هتتنططي بيهم علينا بقى، ايه اللي انتي فيه ده عايشة في جو مش بتاعك وناس بتزيط معاكي ودمك بقى يلطش الخ الخ بقى.. وناس قفشنا في روح بعض لقتهم ولاقوني معرفش ازاي معرفش دخلو في حياتي ازاي بس أهو بقو الأساس.. وغيرهم خلع وناس مقضياها من بعيد لبعيد وناس تقرب وقت ما تحب أو وقت ما المصلحة ما تحب.. اللخبطة دي بدأت من أول ما غيرت أسمى في كل حساباتي الشخصيه على النت ما ندى ديو لندي أبو العزم.. بس انا مش مبسوطة، ولله ما مبسوطة ابدا انا كنت عايشة حال أبسط من ده بمراحل،..بمراحل ياناس!! حياتهم غيري، تفكيرهم أسلوبهم طريقه كلامهم.. وغيره، انا لقتني وسط محيط مرة واحدة ضيق جدآ شاشة مقفولة عليا وكتاب جمبي واوضة قافلاها عليا.. اتغيرت ذوقي اختلف في كل حاجة.. اه المراهقة فيها اضطرابات نفسية كتير بس ما أصحابي عادي.. أو مش زيي! .. مش باقيه على ناس كتير، لا مبالاة.. بنقد كتير.. بسخر دايما.. بتخنق على طول.. مليش في الاجتماعيات، طب مالك ياندي؟ مليش.. ندى جواها حاجات متقالتش لمخلوق في الأرض لسه ولا شكلها هتتقال باين.. ندى خايفه، لو تعمقت اكتر تضييع! ندى مبقتش عاملة حساب لحاجات كتير.. حالة تمرد مش طبيعية.. مبقتش بحكي كتير، كل الرغي فاضي.. انا عندي رغبه في الوحدة الأبدية.. مش مكتئبة،، بس عادي.. حلمي في بلدي وضاع والثورة بح.. عايشة وسط مطبلاتية وناس بتتخانق اكتر ما بيقولو سلامو عليكو.. الواقع بقى عنيف بالنسبالي، فا هربت لعالم افتراضي.. وحبيت الكتب والقراية اكتر.. والمزيكا والافلام.. وكل حاجة مش حقيقية ومش واقعيه! .. خذلان من بشر مش فهماني.. فا سلامو عليكو انا بقى.. ده غير أن أقرب تهمة ليا هي حالة عاطفية فاشلة بمر بيها وده اسخف تحليل لأي حد بيحاول يفهم مالي.. انتو عالم بشعة، المدرسة والعيال السخيفة اللي فيه، المدرسين اللي دماغهم رايحة منهم.. البيت اللي مش فاهمني وانا بعيدة عنهم.. العيلة اللي مبتتجمعش.. الفرحة اللي مش كاملة.. الناس اللي في حياتي ومش فاهمة دخلو ازاي.. الناس اللي مشيوا ومش فاهمة مشيوا وسابوني ليه.. البلد الكافرة باللي طالب بحقها.. كل حاجة،، كل حاجة مقرفه.. دماغي بتنفجر من التفكير.. انا كنت ديو كويس في حالي.. أبو العزم جيه خربها.
